30.04.2019
ԱԷՄԳ-ի գլխավոր տնօրենի այցը ՀԱԷԿ
Ապրիլի 30-ին՝ ժամը 11:00-ին, ՀՀ այցի շրջանակներում Ատոմային էներգիայի միջազգային գործակալության (ԱԷՄԳ) գլխավոր տնօրեն Յուկիա Ամանոն, իր տիկնոջ Յուկիկա Ամանոյի և ԱԷՄԳ-ի գլխավոր տնօրենի օգնական Էդգար Պերեսի հետ ճանաչողական այց են կատարել Հայկական ատոմային էլեկտրակայան: Հյուրերն այցելել են ՀՀ էներգետիկ ենթակառուցվածքների և բնական պաշարների (ԷԵԲՊՆ)նախարարի տեղակալ Հակոբ Վարդանյանի, Ավստրիայի Հանրապետությունում ՀՀ արտակարգ և լիազոր դեսպան Արմեն Պապիկյանի և ԷԵԲՊՆ ու Արտաքին գործերի նախարարության աշխատակիցների ուղեկցությամբ:
Հյուրերը ծանոթացել են ՀԱԷԿ-ի թիվ 2 էներգաբլոկի շահագործման ժամկետի երկարացման ծրագրի շրջանակներում իրականացվող արդիականացման աշխատանքներին և անվտանգության մակարդակի բարձրացմանն ուղղված ծրագրերի ներդրման ընթացքին:
Պատվիրակության անդամները շրջայց են կատարել ՀԱԷԿ-ի տուրբինային արտադրամասում և եղել կենտրոնական ղեկավարման վահանակում:
Այնուհետև տեղի է ունեցել հանդիպում ՀԱԷԿ-ի ղեկավար անձնակազմի հետ:
ԱԷՄԳ Գլխավոր տնօրենը կարևորել է Հայաստանի հետ համագործակցությունը՝ նշելով, որ գործակալությունը պատրաստ է շարունակել իր աջակցությունը Հայաստանի միջուկային էներգետիկայի անվտանգության բարձրացման ոլորտում:
ՀԱԷԿ ՓԲԸ գլխավոր տնօրեն Մ Վարդանյանը շնորհակալություն հայտնելով՝ բարձր է գնահատել ԱԷՄԳ-ի կողմից տարիների ընթացքում ատոմային էներգիայի խաղաղ օգտագործման բնագավառում ՀԱԷԿ-ին ցուցաբերված աջակցության համար:
Պայմանավորվածություն է ձեռք բերվել հետագայում ևս շարունակել ու խորացնել երկկողմ արդյունավետ համագործակցությունը: