08.04.2019
Աջակցության առաքելություն Հայկական ԱԷԿ-ում
2019թ. փետրվարի 25-ից մարտի 1-ն ընկած ժամանակահատվածում Հայկական ԱԷԿ-ի խնդրանքով ՇԿՀԱ Մոսկովյան կենտրոնն անցկացրեց աջակցության առաքելություն (ԱԱ) «Սարքավորումների, շենքերի և կառույցների շրջայցերի կազմակերպում: Շրջայցերի արդյունքում դիտողությունների ու շեղումների հայտնաբերում և վերացում» թեմայով: Աջակցության առաքելության աշխատանքներին մասնակցեցին հետևյալ փորձագետները.
• Կովալյով Եվգենիյ Վլադիմիրի (ՇԿՀԱ ՄԿ, Ռուսաստան)
• Լոբաչյով Պավել Ալեկսեյի (Սմոլենսկի ԱԷԿ, Ռուսաստան)
• Շչերբակով Պավել Բորիսի (Կոլայի ԱԷԿ, Ռուսաստան)
• Ակսյոնով Սեմյոն Վասիլիի(ՇԿՀԱ ՄԿ, Ռուսաստան)
• Պակիդանսկի Վալենտին Սլավչև (Կոզլոդույի ԱԷԿ, Բուլղարիա)
• Շչելիկ Յուրիյ Վլադիսլավի (Կալինինի ԱԷԿ, Ռուսաստան)
Աջակցության առաքելության նպատակներն են.
• ընդօրինակել այլ ԱԷԿ-ների առաջատար փորձը և, հնարավորության դեպքում, ներդնել այն Հայկական ԱԷԿ-ում` շրջայցերի արդյունավետությունը բարձրացնելու, դիտողություններն ու շեղումները հայտնաբերելու և վերացնելու նպատակով: Աջակցության առաքելությունն անց էր կացվում «ասիստ-վիզիտի» ձևաչափով: «Ասիստ-վիզիտի» ընթացքում ԱԱ փորձագետները դիտումներ էին կատարում ԱԷԿ-ի հարթակում, հարցազրույցներ անցկացնում անձնակազմի հետ և գնահատում անձնակազմի աշխատանքը տվյալ ուղղությամբ հայտնաբերված փաստերի հիման վրա: Հիմնվելով սեփական փորձի վրա և հաշվի առնելով լավագույն պրակտիկան` ԱԱ թիմը յուրաքանչյուր ուղղության համար ներկայացրեց առկա խնդիրները և սարքավորումների, շենքերի և կառույցների շրջայցերի կազմակերպման կատարելագործմանն ուղղված հանձնարարականների ցանկը:
Ուրբաթ օրը` մարտի 1-ին, եզրափակիչ խորհրդակցության ժամանակ փորձագետները Հայկական ԱԷԿ-ի ներկայացուցչին փոխանցեցին ԱԱ հաշվետվության նախագիծը, որը պարունակում էր պրոբլեմային ուղղություններին վերաբերող հանձնարարականները և դրական կողմերը: