18.12.2018
ԿԵՆՏՐՈՆԱՑՎԱԾ ՎԵՐԱՆՈՐՈԳՈՒՄՆԵՐԻ ԱՐՏԱԴՐԱՄԱՍ. ՇԱՀԱԳՈՐԾՄԱՆ ԺԱՄԿԵՏԻ ԵՐԿԱՐԱՑՄԱՆՆ ՈՒՂՂՎԱԾ ԱՇԽԱՏԱՆՔՆԵՐ
Կենտրոնացված վերանորոգումների արտադրամասը (ԿՎԱ) հանդիսանում է ՀԱԷԿ-ի ամենամեծ բազմաֆունկցիոնալ կառուցվածքային ստորաբաժանումը, որի հիմնական գործառույթներն են`
- Ռեակտորային, Տուրբինային, Քիմիական արտադրամասերի հիմնական և օժանդակ սարքավորումների վերանորոգումը և սպասարկումը,
- Ռեակտորի վերաբեռնումը,
- Օդափոխման համակարգերի, շոգեարտարկման (пароэжекторный) համակարգերի, կենցաղային օդորակիչների շահագործումը, վերանորոգումը, սպասարկումը,
- Դիզել-գեներատորային կայանի, ազոտաթթվածնային կայանի և համակայանային ճնշակայանի շահագործումը և վերանորոգումը,
- ՀԱԷԿ-ին ազոտով և սեղմված օդով ապահովումը,
- ՀԱԷԿ-ի բոլոր վերելակների, ամբարձիչ մեքենաների և մեխանիզմների վերանորոգումը և շահագործումը,
- Հիմնական արտադրամասերի տված հայտերի հիման վրա եռակցման աշխատաքների կատարումը և ոչ ստանդարտ դետալների ու սարքավորումների պատրաստումը,
- Հրդեհաշիջման նախնական միջոցների սպասարկումը, վերանորոգումը և լիցքավորումը:
ԿՎԱ-ի վերը նշված բոլոր աշխատանքները օպերատիվորեն համակարգվում են ճարտարագիտական խմբի կողմից:
Վերջին տարիներին ՀԱԷԿ-ի շահագործման ժամկետի երկարացման ծրագրով նախատեսված աշխատանքներին իր բոլոր տեղամասերով ներգրավված է նաև ԿՎԱ-ն:
Շահագործման ժամկետի երկարացման ծրագրով ԿՎԱ-ն կատարել է՝
- Դիզել-գեներատորային կայանի ( ԴԳԿ) թվով 5 դիզելների կապիտալ վերանորոգում, որի շնորհիվ ապահովվել է ԴԳԿ-ի անխափան աշխատանքը և հուսալիության ավելի բարձր մակարդակը:
- Ազոտաթթվածնային կայանի կայանքի ամբողջական փոխարինում նոր ավելի արդիական կայանքով, որի շնորհիվ ԿՎԱ-ն ՀԱԷԿ-ին ավելի արագ, հեշտ և քիչ էներգածախսով ապահովվում է որակյալ ազոտով և արդեն նաև թթվածնով:
- Ռեակտորային, Տուրբինային և Քիմիական արտադրամասերի պոմպային ագրեգատների փոխարինում:
- Ռեակտորի գլխավոր անջատատեղի ամրակման տարրերի թվով 59 հավաքված գամասեղների փոխարինում նորով:
- Տուրբինային արտադրամասի 125 տոննա բեռնամբարձությամբ մեքենաների արդիականացում, որը դեռ շարունակվում է:
Շահագործման ժամկետի երկարացման ծրագրով նախատեսվում է`
- Համակայանային ճնշակայանի կայանքների փոխարինում նորով,
- Ռեակտորային արտադրամասում գտնվող 250 և 30 տոննա բեռնամբարձությամբ մեքենաների արդիականացում,
- Ռեակտորային, Տուրբինային և Քիմիական արտադրամասերի պոմպային ագրեգատների փոխարինում,
Օդափոխման համակարգերի արդիականացում: