23.07.2018
<<Ռուսատոմ Սերվիս>> ընկերության գործունեությունը ՀԱԷԿ -ում
2015 թ. հունիսին «Ռուսատոմ Սերվիս» ԲԸ և «ՀԱԷԿ» ՓԲԸ միջև ըստ միջկառավարական համաձայնագրի ստորագրվեց պայմանագիր` Հայկական ԱԷԿ երկրորդ էներգաբլոկի շահագործման ժամկետի երկարացման աշխատանքներ, մատակարարումներ և ծառայություններ կատարելու մասին: «Ռուսատոմ սերվիս» ընկերությունը մատուցում է շահագործման և վերանորոգման հետ կապված ծառայություններ: Սարքավորումների գնման գործընթացը անցկացվել է մրցույթի հիման վրա`«Ռոսատոմ» պետական կորպորացիայի միասնական ճյուղային ստանդարտների համաձայն: Այդ սարքավորումների տեխնիկական պահանջները առաջադրել է ՀԱԷԿ-ը: Սարքավորումների փոխարինման և արդիականացման համար նախատեսված մատակարարումները կատարվում են պայմանագրի պլան-ժամանակացույցին համապատասխան: Զրույց ունեցանք «Ռուսատոմ Սերվիս» ԲԸ ներկայացուցիչների հետ, ներկայացվեց շահագործման ժամկետի երկարացման միջոցառումների ընթացքը: Խոսեցինք նաև գեներատորների արդիականացման և վերանորոգման մասին:
2017թ. դեկտեմբերի 10-ին «Ռուսատոմ Սերվիս» ընկերության կողմից ՀԱԷԿ է հասցվել առաջին տուրբագեներատորը: Զրուցեցինք տուրբինային արտադրամասի՝ շահագործման գծով պետի տեղակալ, կոնդեսատորների գծով արդիականացման նախագծի ղեկավար պրն.Դանիել Դանիելյանի հետ, նրա ուղեկցությամբ եղանք տուրբինային արտադրամասում: Տուրբինային արտադրամասում արդիականացման շրջանակներում 3-րդ տուրբաագրեգատը փոխարինվում է նորով: Այդ գործընթացից հետո կունենանք ակտիվ հզորության աճ՝ 20ՄՎտ-ով: 3-րդ տուրբաագրեգատի վրա կատարվում է հին և մաշված զատիչ-շոգեգերտաքացուցչի (СПП ) փոխարինումը նորով, որի արդյունքում կունենանք ավելի չոր գոլորշի, որն էլ կերկարացնի տուրբինի վերջին աստիճանի թիերի կյանքի տևողությունը: 4-րդ տուրբինի մաշված կոնդեսատորն արդեն փոխարինվել է նոր՝ գերմանական «Բալկե-Դյուր» (Balcke-Durr) ընկերության արտադրության կոնդեսատորով: Նոր կոնդեսատորի աշխատանքը կապահովի 1.2 ՄՎտ հզորության աճ, ինչպես նաև կոնդեսատորի խողովակների անքփությունների հետևանքով չպլանավորված կանգառների բացառում: Տեղեկացանք պրն. Դանիելյանից, որ 4-րդ տուրբինի հին զատիչ- շոգեգերտաքացուցիչը (СПП) փոխարինվել է արդիականով:
Ըստ «Ռոսատոմ» միջուկային էներգիայի պետական կորպորացիայի պաշտոնական կայքի`սարքավորումների փոխադրումը Սանկտ Պետերգուրգում գտնվող գործարանից իրականացվել է երկու փուլով. ծովային ճանապարհով`մինչև Վրաստանի Փոթի նավահանգիստ և այնտեղից `ՀԱԷԿ ցամաքային ճանապարհով: Նոր տուրբագեներատորը տեղադրվել է նախորդ 1970-ականների արտադրության տուրբագեներատորի փոխարեն: Տուրբագեներատորի հետ կնորացվեն նաև օժանդակ համակարգերը. սա նախագծով իրականացվող աշխատանքների առանձնահատկություններից մեկն է: 2-րդ տուրբագեներատորը նախատեսվում է ՀԱԷԿ-ին տրամադրել ս/թ դեկտեմբերի 3-ին, իսկ փոխարինման գործընթացը սկսվելու է 2019թ ապրիլի 15-ից:
Նշենք, որ ռեակտորի 100% ջերմային հզորության դեպքում՝յուրաքանչյուր տուրբագեներատորի էլեկտրական հզորությունը կլինի 236 ՄՎտ : ՀԱԷԿ –ի երկրորդ էներգաբլոկի արդիականացման համար երկու տուրբագեներատորներն էլ արտադրվել են ՌԴ «Սիլովիե մաշինի» (Силовые машины) ընկերության կողմից: Այդ ընկերությունը Էներգետիկայի բնագավառում ռուսական մեքենաշինական ընկերություն է, որը տեղադրված սարքավորումների ծավալով ներառված է աշխարհի առաջատարների տասնյակում:
Ռուսաստանի կառավարության տրամադրած վարկի և դրամաշնորհի հաշվին կատարվում է հիմնական և օժանդակ սարքավորումների վերանորոգում և արդիականցում`ՀԱէԿ –ի նախագծային կյանքը երկարացնելու, ինչպես նաև արտադրության արդյունավետության և անվտանգության մակարդակը բարձրացնելու նպատակով: Աշխատանքները կավարտվեն մինչև 2020թ: Արդյունքում կայանի հզորությունը, առանց վառելիքի ծախս ավելացնելու, ներկայիս 390ՄՎտ-ից կաճի մինչև 430ՄՎտ: