«Հայկական Ատոմային էլեկտրակայան» ՓԲԸ գլխավոր տնօրեն, ՇԿՀԱ Մոսկովյան կենտրոնի Կառավարիչների խորհրդի նախագահ Էդուարդ Մարտիրոսյանը հոկտեմբերի 23–ից 24-ը Բուդապեշտում մասնակցել է ՇԿՀԱ Կառավարիչների խորհրդի և Ռազմավարության, կառավարման ու նշանակումների կոմիտեի նիստերին։

Նստաշրջանների ընթացքում ՇԿՀԱ կենտրոնական գրասենյակի ղեկավարության և Մոսկովյան, Շանհայի, Լոնդոնի, Տոկիոյի ու Ատլանտյան տարածաշրջանային կենտրոնների ղեկավարների մասնակցությամբ քննարկվել են կառույցի անդամակցության ընդլայնմանը, նոր անդամների ներգրավմանն ու աջակցման համակարգերի կատարելագործմանը վերաբերող հիմնարար հարցեր։ Հատուկ ուշադրություն է դարձվել նաև գործող էներգաբլոկների անվտանգության բարձրացմանը, շահագործման արդյունավետության աճին և շահագործման ժամկետի օպտիմալացման հնարավորություններին։

Ընդգծվել է ՇԿՀԱ-ի առանցքային դերը՝ որպես հարթակ՝ փորձի փոխանակման, լավագույն միջազգային պրակտիկաների ներդրման և մասնագիտական կարողությունների շարունակական զարգացման համար։

ՇԿՀԱ Գործադիր տնօրեն Նաոկի Չիգուսան բարձր է գնահատել անդամ-կազմակերպությունների հետևողական աշխատանքը կայանների շահագործման արդյունավետության և կառավարման մշակույթի շարունակական կատարելագործման ուղղությամբ։ Նա առանձնացրել է «Ընթացք դեպի կատարելություն» նախաձեռնության շրջանակում իրականացվող արդիականացումները՝ ընդգծելով, որ տվյալների վերլուծության և գործընթացների վերահսկման նոր համակարգերի ներդրումը նպաստում է կայանների հուսալիության և արտադրողականության շարունակական բարձրացմանը։