Ս/թ դեկտեմբերի 21-ից 23-ը ՀԱԷԿ-ի Ուսումնավարժական կենտրոնում անցկացվեց Հայկական ԱԷԿ-ի և ՇԿՀԱ Մոսկովյան կենտրոնի կողմից համատեղ կազմակերպված «Շահագործական որոշումների կայացում» թեմայով սեմինար:

Սեմինարին մասնակցեցին ՀԱԷԿ-ի 27 աշխատակից, ինչպես նաև ՇԿՀԱ Մոսկովյան կենտրոնի և Բելոյարսկի ԱԷԿ-ի ներկայացուցիչներ:

Ուսուցողական սեմինարի ծրագիրը ներառել էր հետևյալ թեմաները.

• Շահագործական որոշումների կայացման մեթոդաբանությունը;
• Որոշումների կայացման գործընթացի դիտարկում;
• Որոշումների տիպերը՝ պահպանողական, շահագործական և ռազմավարական;
• Մասնակիցների պարտավորությունները և որոշումների կայացման որակյալ գործընթացի ձևավորման գործիքակազմը;
• Չորս դասընթացի օրինակի հիման վրա ճիշտ շահագործական որոշումների կայացման պրակտիկ օրինակներ:

Եզրափակիչ օրը մասնակիցները քննարկեցին պրակտիկ վարժությունների արդյունքները և ներկայացրին իրենց առաջարկությունները, որոնք կներառվեն հուշաթերթիկի մեջ և կուղարկվեն բոլոր մասնակիցներին:

Հյուրերը նաև տեխնիկական շրջայց կատարեցին ՀԱԷԿ-ում:

“Train the trainers” հայեցակարգի իրագործման շրջանակներում ուսուցողական բոլոր նյութերը ողջ ծավալով փոխանցվեցին Հայկական ԱԷԿ-ին: